గోల్డ్ లోన్ తీసుకుంటున్నారా? ముందు ఈ మతలబు తెలుసుకోండి!

గోల్డ్ లోన్ పోర్ట్ ఫోలియోకు సంబంధించి ఐఐఎఫ్‌ఎల్ ఫైనాన్స్‌పై ఆర్‌బీఐ చర్యలు తీసుకుంది. వాస్తవానికి, కంపెనీకి చెందిన 67 శాతం గోల్డ్ లోన్ ఖాతాల్లో లోన్ టు వాల్యూ రేషియో అంటే ఎల్‌టీవీలో తేడా ఉన్నట్లు దర్యాప్తులో వెల్లడైంది. అప్పు ఇస్తున్నప్పుడు బంగారం ధరను నిర్ణయించడంలో మోసం చేయడం బయటపడింది. దీంతో ఐఐఎఫ్ఎల్ ఫైనాన్స్.. బంగారు రుణాలు ఇవ్వకుండా RBI నిషేధించింది.

నిజానికి, గోల్డ్ లోన్ తీసుకునే ప్రక్రియ చాలా సులభం. అనేక నాన్-బ్యాంకింగ్ ఫైనాన్స్ కంపెనీలు అంటే NBFCలు ఇంటింటికీ బంగారు రుణ సౌకర్యాలను అందిస్తున్నాయి. గోల్డ్ లోన్‌కు విద్య లేదా వ్యక్తిగత రుణం వంటి ఎక్కువ పత్రాలు అవసరం లేదు. కొన్ని గంటల్లోనే లోన్ అందుబాటులోకి వస్తుంది. అందుకే గోల్డ్ లోన్ డిమాండ్ వేగంగా పెరుగుతోంది. భారతదేశంలో గోల్డ్ లోన్ వ్యవస్థీకృత మార్కెట్ దాదాపు రూ.6 లక్షల కోట్లు. ఇందులో బ్యాంకుల వాటా 80 శాతం కాగా, మిగిలిన 20 శాతం ఎన్‌బీఎఫ్‌సీలది. అటువంటి పరిస్థితిలో, మీరు గోల్డ్ లోన్ తీసుకోవాలని ఆలోచిస్తున్నట్లయితే, కొన్ని ముఖ్యమైన విషయాలను జాగ్రత్తగా అర్థం చేసుకోండి.

మీరు ఏదైనా బ్యాంక్ లేదా NBFC నుంచి గోల్డ్ లోన్ తీసుకోవడానికి వెళ్ళినప్పుడు, వారు చేసే మొదటి పని మీ బంగారం ధరను నిర్ణయించడం. RBI నిబంధనల ప్రకారం, బ్యాంకులు, NBFCలు బంగారం విలువలో 75 శాతం వరకు మాత్రమే రుణాలు ఇవ్వగలవు. రుణం ఇచ్చే సమయంలో ఐఐఎఫ్‌ఎల్ బంగారం ధరను తక్కువగా అంచనా వేసి, తక్కువ రుణం ఇచ్చినట్లు వెలుగులోకి వచ్చింది. వినియోగదారుడు రుణాన్ని తిరిగి చెల్లించలేకపోతే, ఆ బంగారాన్ని వేలం వేయడం ద్వారా కంపెనీ ఆ బంగారం వాస్తవ ధరను పొందింది.

కాబట్టి, గోల్డ్ లోన్ తీసుకునే ముందు, మీ బంగారం విలువను వేరే కంపెనీ దగ్గర కూడా అంచనా వేయించండి. ఈ రోజుల్లో తనిష్క్ , కళ్యాణ్ జ్యువెలర్స్ వంటి అనేక సంస్థలు బంగారం ధరకు సంబంధించిన సర్వీసులను ఉచితంగానే అందిస్తున్నాయి. రశీదు కూడా ఇస్తున్నాయి.

ఏదైనా ఫైనాన్స్ కంపెనీ మీ బంగారం విలువను తక్కువగా అంచనా వేస్తున్నట్లయితే ముందు మీరు అలెర్ట్ అవ్వండి. కంపెనీ ఉద్దేశాలు సరిగా లేవని అర్థం చేసుకోండి. మీరు అటువంటి కంపెనీ నుండి రుణం తీసుకుంటే, అది వడ్డీ , పెనాల్టీ పరంగా మిమ్మల్ని మోసం చేసే ఛాన్స్ ఉంది.

బ్యాంకులు, ఎన్‌బిఎఫ్‌సిల బంగారు రుణాలపై వడ్డీ రేట్లలో భారీ వ్యత్యాసం ఉంది. ఉదాహరణకు, ప్రభుత్వ బ్యాంకులు 8.65 నుండి 11 శాతం వడ్డీకి బంగారు రుణాలను ఇస్తున్నాయి, అయితే ప్రైవేట్ రంగంలో యాక్సిస్, హెచ్‌డిఎఫ్‌సి బ్యాంకులు సంవత్సరానికి 17 శాతం వరకు వడ్డీని వసూలు చేస్తున్నాయి. అయితే NBFCల బంగారు రుణాలపై వడ్డీ రేట్లు 36 శాతం వరకు ఉంటాయి.

అదేవిధంగా బ్యాంకులు, ఎన్‌బీఎఫ్‌సీల ప్రాసెసింగ్ ఫీజుల్లో కూడా చాలా తేడా ఉంటుంది. SBI, కెనరా బ్యాంక్ రుణ మొత్తంపై 0.5% లేదా గరిష్టంగా రూ. 5,000 ప్రాసెసింగ్ ఫీజును వసూలు చేస్తున్నాయి. అయితే NBFCలు లోన్ మొత్తంలో 1% కంటే ఎక్కువ ప్రాసెసింగ్ ఫీజులను వసూలు చేస్తున్నాయి. అటువంటి పరిస్థితిలో, కొద్దిగా హోంవర్క్ చేయడం ద్వారా, మీరు ప్రతీ సంవత్సరం వడ్డీ రూపంలో పెద్ద మొత్తాన్ని ఆదా చేయవచ్చు.

సాధారణంగా గోల్డ్ లోన్ మూడేళ్లు ఉంటుంది. ఈ రుణాన్ని తిరిగి చెల్లించడానికి అనేక ఎంపికలు అందుబాటులో ఉన్నాయి. మొదటి ఆప్షన్ లో, మీరు ప్రతి నెలా వడ్డీని చెల్లిస్తారు. చివరికి మీరు అసలు మొత్తాన్ని తిరిగి చెల్లించవచ్చు. రెండవ ఆప్షన్ లో, మీరు ప్రతి నెలా చెల్లించే వడ్డీ , అసలు మొత్తాన్ని కలపడం ద్వారా ద్వారా EMI అవుతుంది. కొన్ని గోల్డ్ లోన్లలో బుల్లెట్ చెల్లింపు సౌకర్యం అందుబాటులో ఉంది. ఉదాహరణకు, మీరు లక్ష రూపాయల రుణం తీసుకున్నారు. ఈ అప్పుపై ఏడాదిలో రూ.10 వేల వడ్డీ వచ్చింది. ఏడాది పూర్తయిన తర్వాత, ఒకే మొత్తంలో రూ. 1.10 లక్షలు చెల్లించి మీ బంగారాన్ని విత్‌డ్రా చేసుకోవచ్చు. వీటిలో, మీరు ఏ ఆప్షన్ కావాలన్నది మీ సౌలభ్యం ప్రకారం ఎంచుకోవచ్చు.

వ్యక్తిగత ఆర్థిక నిపుణుడు జితేంద్ర సోలంకి మాట్లాడుతూ బంగారం ధర కంటే బంగారం రుణం మొత్తం.. ఎప్పుడూ తక్కువగానే ఉంటుంది. ఫైనాన్స్ కంపెనీ బంగారం వాల్యుయేషన్‌ను తగ్గిస్తే, మీకు అప్పు తక్కువగా వస్తుంది. ఏదైనా కారణం వల్ల మీరు ఈ రుణాన్ని తిరిగి చెల్లించలేకపోతే, మీ బంగారాన్ని వేలం వేస్తారు. దీనివల్ల మీకు భారీ నష్టం కలగవచ్చు. కాబట్టి గోల్డ్ లోన్ తీసుకునేటప్పుడు, బంగారం వాల్యుయేషన్, వడ్డీ , ప్రాసెసింగ్ ఫీజుల గురించి పూర్తిగా మీరు హోమ్‌వర్క్ చేయండి.

లాభదాయకమైన వ్యాపారం కావడంతో, మార్కెట్‌లో గోల్డ్ లోన్ ప్రొవైడర్లు చాలా మంది ఉన్నారు. కానీ మీరు ఆర్‌బీఐ నియంత్రిత బ్యాంక్ లేదా ఫైనాన్స్ కంపెనీ నుంచి మాత్రమే గోల్డ్ లోన్ తీసుకోవాలి. మీ తిరిగి చెల్లించే సామర్థ్యం ఆధారంగా రుణం మొత్తాన్ని నిర్ణయిస్తారు.