EPFO చెప్పిన శుభవార్త ఏమిటి? ఏ కంపెనీ తాజాగా లే ఆఫ్ ను ప్రకటించింది?

హలో నేను మీ సుమతి… EPFO.. తన సభ్యులకు చెప్పిన శుభవార్త ఏమిటి? అత్యంత విలాసవంతమైన గృహాలను ఎక్కడ అమ్ముతున్నారు? 2024లో ఏ కంపెనీ తొలిసారిగా ఉద్యోగులను తొలగించింది? ఇలాంటి మరెన్నో విశేషాలు మన లంచ్ బాక్స్ లో..

– ఈపీఎఫ్‌లో కీలక మార్పు.. ఇకపై రూ.1 లక్ష వరకు విత్‌డ్రా

EPFO.. చందాదారుల క్యాష్ విత్ డ్రా విషయంలో కీలక మార్పులు చేసింది. వైద్య ఖర్చుల కోసం చేసే 68జే క్లెయిమ్‌ల అర్హత పరిమితిని రూ. 50,000 నుంచి రూ.1 లక్షకు పెంచుతున్నట్లు ప్రకటించింది. ఈపీఎఫ్‌వో కొత్త మార్పు ప్రకారం.. చందాదారులు తమ వ్యక్తిగత లేదా కుటుంబ సభ్యుల వైద్య చికిత్స ఖర్చుల కోసం ఇకపై రూ.1 లక్ష వరకూ ఉపసంహరించుకోవచ్చు. నెల అంతకంటే ఎక్కువ రోజులు ఆస్పత్రిలో చికిత్స తీసుకుంటున్నా, ఆపరేషన్లు చేయించుకున్నా క్లెయిమ్‌ చేయొచ్చు. పక్షవాతం, టీబీ, క్షయ, క్యాన్సర్‌, గుండె సంబంధిత చికిత్స కోసం కూడా నగదు విత్‌డ్రాకు దరఖాస్తు చేసుకోవచ్చు. రూ. లక్ష పరిమితికి లోబడి ఉద్యోగుల ఆరు నెలల బేసిక్ వేతనంతోపాటు డీఏ లేదా ఈపీఎఫ్‌లో ఉద్యోగి వాటా వడ్డీతో సహా ఏది తక్కువైతే అంత వరకూ మాత్రమే విత్ డ్రా చేసుకోవడానికి, క్లెయిమ్ చేయడానికి వీలుంటుంది. దీనికోసం ఎలాంటి మెడికల్‌ సర్టిఫికెట్లు లేకుండా సెల్ఫ్‌ డిక్లరేషన్‌ సమర్పించి దరఖాస్తు చేసుకోవచ్చు.

– ఒక్క నెలలో మూడోసారి FD పై వడ్డీ రేటును పెంచిన ఐసిఐసిఐ

దేశంలోని అతిపెద్ద ప్రైవేట్ రంగ బ్యాంక్ ఐసిఐసిఐ బ్యాంక్ తన ఎఫ్‌డి వడ్డీ రేట్లను పెంచుతూ నిర్ణయం తీసుకుంది. ICICI బ్యాంక్ అధికారిక వెబ్‌సైట్‌లో ఇచ్చిన సమాచారం ప్రకారం, బల్క్ FD వడ్డీ రేట్లను రూ. 2 నుంచి 5 కోట్ల వరకు పెంచాలని బ్యాంక్ నిర్ణయించింది. ఈ పెరుగుదల తర్వాత, బ్యాంక్ 7 రోజుల నుంచి 10 సంవత్సరాల బల్క్ FD పథకంపై సాధారణ పౌరులకు 4.75 శాతం నుంచి 7 శాతం వడ్డీ రేటును అందిస్తోంది. 1 సంవత్సరం నుంచి 389 రోజుల FDలపై అత్యధిక వడ్డీ రేటును అందిస్తోంది. సీనియర్ సిటిజన్లకు 7.25 శాతం వడ్డీని అందిస్తోంది, ఇంతకుముందు ఏప్రిల్ 1వ తేదీ , ఏప్రిల్ 9వ తేదీలలో బ్యాంకు తన వడ్డీ రేట్లను పెంచింది

– మ్యూచువల్ ఫండ్స్‌ ఆస్తులలో 35 శాతం పెరుగుదల

దేశీయ మ్యూచువల్ ఫండ్ పరిశ్రమకు 2024 ఆర్థిక సంవత్సరం అద్భుతమైనదని నిరూపణ అయ్యింది. AMFI అంటే అసోసియేషన్ ఆఫ్ మ్యూచువల్ ఫండ్స్ ఇన్ ఇండియా తాజా నివేదిక ప్రకారం, మార్చి 2024 నాటికి AUM అంటే అండర్ మేనేజ్‌మెంట్ ఆస్తులు రికార్డు స్థాయిలో రూ. 53.40 లక్షల కోట్లకు చేరుకున్నాయి. గత మార్చి 2023లో ఈ సంఖ్య రూ. 39.42 లక్షల కోట్లు. దాని ప్రకారం చూస్తే ఒక్క ఏడాదిలో రూ.14 లక్షల కోట్లకు పైగా పెరుగుదల నమోదైంది. మ్యూచువల్ ఫండ్ పరిశ్రమ FY21లో 41% వృద్ధి నమోదు చేసి రికార్డు సృష్టించింది. దీని తరువాత, ఇప్పుడు FY24 లో 35% వృద్ధి తో రెండో రికార్డు నమోదు చేసింది.

– భారతదేశంలోని ఈ నగరంలో కోట్ల విలువైన విలాసవంతమైన గృహాలు అత్యధికంగా అమ్ముడవుతున్నాయి.

Cushman & Wakefield నివేదిక ప్రకారం, లగ్జరీ అపార్ట్‌మెంట్‌ల డిమాండ్‌లో Delhi-NCR దేశంలోని ఇతర మార్కెట్‌ల కంటే ముందుంది. మార్చి త్రైమాసికంలో Delhi-NCRలో కొత్త లాంచ్‌లలో లగ్జరీ అపార్ట్‌మెంట్ల వాటా 61 శాతంగా ఉంది. Delhi-NCR మార్కెట్‌లో లగ్జరీ ఇళ్లకు డిమాండ్ బలంగా ఉందని ఇది చూపిస్తుంది. మొత్తం లాంచ్‌లలో ముంబై , బెంగళూరులోని లగ్జరీ అపార్ట్‌మెంట్‌ల వాటా వరుసగా 26 శాతం, 19 శాతం కాగా… కుష్‌మన్ & వేక్‌ఫీల్డ్ నివేదికలో, ఆ ఇళ్లను లగ్జరీ కేటగిరీలో ఉంచారు, దీని ధర చదరపు అడుగుకు కనీసం రూ.15 వేలు.

– AI ఫీచర్లతో కొత్త టీవీని విడుదల చేసిన శాంసంగ్

దక్షిణ కొరియాకు చెందిన టెక్ కంపెనీ శాంసంగ్ భారత్‌లో సరికొత్త టీవీలను విడుదల చేసింది. ఈ శ్రేణిలో Neo QLED 8K, Neo QLED 4K , OLED TV మోడల్స్ ఉన్నాయి. బెంగళూరులోని సామ్‌సంగ్ ఒపెరా హౌస్‌లో జరిగిన ‘అన్‌బాక్స్ అండ్ డిస్కవర్’ ఈవెంట్‌లో ప్రదర్శించిన ఈ టీవీలు 55 అంగుళాల నుంచి 98 అంగుళాల పరిమాణంలో అందుబాటులో ఉన్నాయి. కొత్త టీవీలలో అనేక ఆర్టిఫిషియల్ ఇంటెలిజెన్స్ (AI) ఫీచర్లు ఉన్నాయని సామ్‌సంగ్ తెలిపింది. AI అనుభవాన్ని మెరుగుపరుస్తుంది. AIని సౌండ్‌లో కూడా ఉపయోగించారు. ఇది నేపథ్య శబ్దాన్ని గుర్తించి.. దానికదే వాల్యూమ్‌ను సర్దుబాటు చేస్తుంది.

– 2024లో గూగుల్ ఫస్ట్ లేఆఫ్

2024 మొదటి లేఆఫ్‌ను టెక్ దిగ్గజం గూగుల్ ప్రకటించింది. పునర్నిర్మాణ ప్రణాళిక కింద కంపెనీ ఈ తొలగింపులను చేసింది. అమెరికా మీడియా ఓ కథనంలో పేర్కొంది. కంపెనీ CFO రూత్ పోరాట్ ఒక మెమో ద్వారా తొలగింపు గురించి సమాచారం అందించారు. కంపెనీ కొత్త ప్లాన్ గురించి చెప్పారు. కొంత కాలం క్రితం గూగుల్ సీఈఓ సుందర్ పిచాయ్ కూడా లేఆఫ్ గురించి ఒక ప్రకటన ఇచ్చారు. ప్రస్తుతానికి ఎంత మంది ఉద్యోగులను తొలగించారనేది వెల్లడికాలేదు. ఈ రిట్రెంచ్‌మెంట్ వల్ల ఫైనాన్స్ డివిజన్‌లోని ఎక్కువగా నష్టపోయారని నివేదిక పేర్కొంది. ఈ తొలగింపు ఆసియా, యూరప్, మధ్యప్రాచ్యంలోని Google ఉద్యోగులపై ప్రభావం చూపుతుంది. బెంగళూరు, డబ్లిన్, మెక్సికో సిటీ, అట్లాంటా , చికాగోలలో సెంట్రల్ హబ్‌లను కంపెనీ నిర్మించబోతున్నట్లు నివేదిక పేర్కొంది.